ថ្ងៃនេះ ថៃមានអ្នកឆ្លងកូវីដចំនួន ៩.៤៤៥ ករណីទៀត និងស្លាប់៨៤នាក់
បាងកក ៖ ក្រសួងសុខាភិបាលថៃនៅព្រឹកថ្ងៃអង្គារនេះ បានប្រកាសរកឃើញករណីឆ្លងថ្មីនៃជំងឺកូវីដ ១៩ ចំនួន ៩.៤៤៥ករណី និងមានអ្នកស្លាប់ចំនួន៨៤នាក់បន្ថែមទៀតក្នុងរយៈពេល២៤ម៉ោងចុងក្រោយនេះ។ នេះបើយោងតាមសារព័ត៌មាន បាងកកប៉ុស្តិ៍។
បើតាមក្រសួងសុខាភិបាលថៃបញ្ជាក់ថា ក្នុងចំនួនឆ្លងខាងលើនេះគឺមានចំនួន ៩.២៤៤ សម្រាប់ប្រជាជនទូទៅនិង ២០១ ករណីដែលជាអ្នកទោសក្នុងពន្ធនាគារ។ ទន្ទឹមនឹងនេះនៅថ្ងៃច័ន្ទម្សិលមិញអ្នកជំងឺកូវីដ -១៩ ចំនួន ១១.៤៥២ នាក់ត្រូវបានអនុញ្ញាតឱ្យចេញពីមន្ទីរពេទ្យបន្ទាប់ពីបានជាសះស្បើយ។
សូមជម្រាបថា ចាប់តាំងពីថ្ងៃទី ១ ខែមេសានៅពេលដែលរលកទី ៣ នៃជំងឺកូវីដ ១៩ បានចាប់ផ្តើម ប្រទេសថៃបានព្យាបាលអ្នកជំងឺកូវីដ ១៩ ចំនួន ១.៧០១.៥០១ នាក់ដែលក្នុងនោះ ១.៥៧៦.៩២៩ នាក់បានជាសះស្បើយ។ ចំណែកចំនួនអ្នកស្លាប់មានចំនួន ១៧.៧៤១ នាក់ក្នុងកំឡុងពេលរលកទី ៣ និង ១៧.៨៣៥ នាក់ចាប់តាំងពីការចាប់ផ្តើមនៃជំងឺរាតត្បាតនេះ៕