វៀតណាមបន្តរកឃើញអ្នកឆ្លងកូវីដ១៩ ចំនួន៤,០៤៥ករណីទៀត និងស្លាប់៥៣នាក់

ហាណូយ ៖ នៅថ្ងៃអាទិត្យម្សិលមិញក្រសួងសុខាភិបាលវៀតណាមបានប្រកាសពីការបន្តរកឃើញករណីឆ្លងជំងឺកូវីដ១៩ ចំនួន៤,០៤៥ ករណី និងអ្នកស្លាប់ថ្មី ដោយសារជំងឺដ៏កាចសាហាវនេះទេចំនួន៥៣នាក់បន្ថែមទៀត ក្នុងរយៈពេល២៤ម៉ោងចុងក្រោយនេះ។ នេះបើតាមតាមការចេញផ្សាយ ដោយទីភ្នាក់ងារសារព័ត៌មាន Viet Nam News។

បើតាមក្រសួងសុខាភិបាលវៀតណាមបញ្ជាក់ថា ក្នុងចំណោមករណីឆ្លងថ្មីៗខាងលើ មាន១៧ករណីជាករណីនាំចូល ក្រៅពីនោះជាករណីឆ្លងក្នុងស្រុកទាំងអស់ ខណៈទីក្រុងហូជីមិញដែលជាចំណុចកណ្តាល នៃការផ្ទុះរីករាលនៃជំងឺនេះបានរ៉ាប់រងករណីឆ្លងថ្មីតែឯងរហូតដល់៩៦៦នាក់។

សូមជម្រាបថា គិតត្រឹមយប់ថ្ងៃទី២៤ ខែតុលា ឆ្នាំ២០២១នេះ វៀតណាមមានករណីឆ្លងកូវីដ-១៩ សរុបនៅទូទាំងប្រទេសចំនួន ៨៨៨,៩៤០នាក់ ក្នុងនោះអ្នកជំងឺជាសះស្បើយចំនួន ៨០៥,៩៧៨នាក់ ចំណែកចំនួនអ្នកស្លាប់សរុបចំនួន ២១,៦៧៣នាក់៕