FIFA ហាមប្រាមរុស្ស៊ី មិនឲ្យប្រើទង់ជាតិ និងភ្លេងជាតិក្នុងការប្រកួតអន្តរជាតិនានា
ពិភពលោក ៖ សហព័ន្ធបាល់ទាត់អន្តរជាតិ FIFA កាលពីថ្ងៃអាទិត្យ បានធ្វើការហាមប្រាមរុស្ស៊ី មិនឲ្យមានការដាក់ទង់ជាតិ ក៏ដូចជាចាក់ភ្លេងជាតិឡើយក្នុងការប្រកួតជាលក្ខណៈអន្តរជាតិនានាចាប់ពេលនេះតទៅ ជាការឆ្លើយតបទៅនឹងរុស្ស៊ីដែលបានលើកទ័ពចូលលុកលុយប្រទេសអ៊ុយក្រែន។
FIFA បានប្រាប់ទៅរុស្ស៊ីថា សម្រាប់ការប្រកួតដែលនឹងមកដល់នាពេលខាងមុខនេះ ក្រុមបាល់ទាត់ជម្រើសជាតិត្រូវតែប្រកួតនៅក្នុងទីលានអព្យាក្រិត្យ ដោយពុំមានដាក់បង្ហាញទង់ជាតិរុស្ស៊ី និងភ្លេងជាតិបន្លឺឡើងឡើយ។
ការហាមប្រាមទាំងនេះកើតឡើងបន្ទាប់ពីសហព័ន្ធកីឡា និងប្រទេសជាច្រើនបានលុបចោលការប្រកួតនៅក្នុងប្រទេសរុស្ស៊ី និងបានបដិសេធមិនប្រឈមមុខនឹងក្រុមរុស្ស៊ី ដើម្បីជាការឆ្លើយតបចំពោះការឈ្លានពានរបស់រុស្ស៊ីមកលើអ៊ុយក្រែន។
សាធារណរដ្ឋឆេក ប៉ូឡូញ និងស៊ុយអែត បាននិយាយថា ក្រុមជម្រើសជាតិរបស់ពួកគេនឹងមិនចូលរួមប្រកួតជម្រុះ World Cup ជាមួយរុស្ស៊ីនៅខែក្រោយនោះទេ។ សមាគមបាល់ទាត់របស់អង់គ្លេសក៏បាននិយាយផងដែរថាក្រុមជម្រើសជាតិរបស់ខ្លួននឹងមិនប្រកួតជាមួយរុស្ស៊ី ផងដែល។
FIFA បាននិយាយនៅក្នុងសេចក្តីថ្លែងការណ៍មួយថា «FIFA មានការសោកស្តាយដែលរុស្ស៊ីសម្រេចជ្រើសរើសប្រើកំលាំងទ័ពទៅលើអ៊ុយក្រែន។ ហិង្សាពុំមែនជាដំណោះស្រាយទេ ហើយស្ថាប័ននេះក៏ជំរុញឲ្យដោះស្រាយប្រកបដោយសន្តិវិធី ដើម្បីសុវត្ថិភាពដល់ប្រជាជនអ៊ុយក្រែន»៕