ចំណាប់អារម្មណ៍​គ្រូបង្វឹក U-23 កម្ពុជា និង​ជប៉ុន មុន​ប៉ះគ្នា​នៅ​ម៉ោង​១១​ព្រឹក​នេះ​

ភ្នំពេញ ៖ មុន​ប៉ះគ្នា​នៅ​ម៉ោង​១១​ព្រឹក​នេះ រវាង​ក្រុម U-23 កម្ពុជា និង ជប៉ុន ក្នុង​វគ្គ​ជម្រុះ​ពានរង្វាន់ AFC U23 Asian Cup 2022 លោក Ryu Hirose គ្រូបង្វឹក​ក្រុម​គោព្រៃ​ជំទង់​កម្ពុជា​បាន​ថ្លែងថា​«​ទោះបីជា​ក្រុម​ជប៉ុន​មាន​កម្រិត​លើ​យើង យើង​នៅតែ​ឈរលើ​គោលការណ៍​លេង​បាល់​តាមរបៀប​របស់​យើង​។ លើសពីនេះ យើង​ចង់​ជម្នះ​ខ្លួនឯង ដូច​អ្វីដែល​យើង​បានលើកឡើង​ខាងលើ ទោះបីជា​គូប្រកួត​យើង​មាន​ជំនាញ និង​សមត្ថ​ភាពខ្លាំង​យ៉ាងណាក៏ដោយ​»​។​

​ចំណែក​គ្រូ U23 ជប៉ុន​លោក Togashi Koichi និយាយថា «​កម្ពុ​ជាមាន​កីឡាករ​ដែលមាន​បច្ចេក​ទេស​ល្អ​ច្រើន​។ ខ្ញុំ​គិតថា កម្ពុជា​គឺជា​ក្រុម​ល្អ​មួយ តាម​ការយល់ឃើញ​រប​ស់​ខ្ញុំ​។ យ៉ាងណាមិញ ក្រុម​យើង​នឹង​លេង​តាម​លក្ខណៈពិសេស​របស់​យើង ដែល​យើង​អាច​ប្រយុទ្ធ​ជាមួយ​ក្រុម​តែមួយ ក្នុង​ការលេង​វាយប្រហារ និង​លេង​ការពារ​។ យើង​នឹង​លេង​ជាមួយ​ភាព​រីករាយ​សម្រាប់​ការប្រកួត​កម្រិត​អន្ដរជាតិ​នេះ ទោះបីជា​ការប្រកួត​នេះ ត្រូវ​លេង​ក្នុងស្ថានភាព​លំបាក​នៃ​វិបត្តិ​កូ​វីដ​-១៩ ក៏ដោយ​»​។​

​គួរ​ដឹងថា នេះ​គឺជា​ការប្រកួត​បញ្ច​ប់ពូ​ល K របស់ U23 កម្ពុជា ក្រោយ​លត់​ក្រុម U23 ហុងកុង ៤-២ កាលពី​ចុង​សប្ដាហ៍​កន្លងទៅ​។ រីឯ​ក្រុម U23 ជប៉ុន ទើប​ប្រកួត​លើកដំបូង មុន​ពួកគេ​ប្រកួត​បញ្ចប់​ពូ​ល​ជាមួយ​ហុងកុង នា​ថ្ងៃទី​២៨ ខែតុលា​។​

​ដោយឡែក​សម្រាប់​ការប្រកួត​នេះ កម្ពុជា​ត្រូវការ​ពិន្ទុ​ចាំបាច់ ដើម្បី​រក្សា​ឱកាស​ប្រជែង​កៅអី​វគ្គ​បន្ដ ពោល​បើសិន​កម្ពុជា​ឈ្នះ កម្ពុជា​នឹង​ឡើង​វគ្គ​បន្ដ​ដោយ​ស្វ័យប្រវត្តិ តែបើ​ស្មើ កម្ពុជា​ត្រូវ​ចាំ​អ៊ុត​លទ្ធផល​ការប្រកួត រវាង​ជប៉ុន និង​ហុងកុង ក៏ដូចជា​លទ្ធផល​ពូ​ល​ផ្សេងៗ​ទៀត​៕