WHO ៖ វិបត្តិជំងឺកូវីដ-១៩នឹងមិនចប់ក្នុងពេលឆាប់ៗ នោះទេ និងអំពាវនាវឲ្យមានការស្រាវជ្រាវវ៉ាក់សាំងជំនាន់ថ្មី
វ៉ាស៊ីនតោន ៖ អង្គការសុខភាពពិភពលោក (WHO) បានប្រកាសកាលពីថ្ងៃអង្គារថា វិបត្តិជំងឺកូវីដ-១៩ នឹងមិនចប់ក្នុងពេលឆាប់ៗ និងមិនងាយៗស្រួលៗនោះទេ ស្របពេលដែល WHO បានអំពាវនាវឲ្យមានការសិក្សាស្រាវជ្រាវរកវ៉ាក់សាំងជំនាន់ថ្មី សម្រាប់ការគ្រប់គ្រង ជំងឺរាតត្បាតរយៈពេលវែងនេះ។
ប្រធាន WHO បាននិយាយថា ថ្វីបើមានវឌ្ឍនភាពតាមរយៈការបង្កើនយុទ្ធនាការនៃការចាក់វ៉ាក់សាំង និងការព្យាបាលជំងឺកូវីដ-១៩ ក៏ដោយ ប៉ុន្តែការវិភាគអំពីស្ថានភាពបច្ចុប្បន្ន និងការព្យាករណ៍បានបង្ហាញឲ្យឃើញថា ជំងឺរាតត្បាតនេះនៅវែងឆ្ងាយណាស់ មិនបញ្ចប់ក្នុងពេលឆាប់ៗនោះទេ។
ស្របពេលជាមួយគ្នានោះដែរ WHO ក៏បានអំពាវនាវឲ្យមានការស្រាវជ្រាវបន្ថែមលើ ម៉ាស និងឧបករណ៍ជំនួយខ្យល់ដកដង្ហើមដែលអាចប្រើបាន និងវ៉ាក់សាំងជំនាន់ថ្មី ការវិនិច្ឆ័យរោគ និងការព្យាបាលជំងឺ ដើម្បីគ្រប់គ្រងជំងឺរាតត្បាតរយៈពេលវែងនេះ។
ជាមួយគ្នានេះ WHO ក៏បានសម្ដែងការព្រួយបារម្ភអំពីបញ្ហាប្រឈមរបស់ទ្វីបអាហ្វ្រិកក្នុងការដោះស្រាយជំងឺរាតត្បាតនេះ ទៅលើការទទួលបានវ៉ាក់សាំង ការធ្វើតេស្ត និងការព្យាបាល ក៏ដូចជាការប្រមូល និងវិភាគទិន្នន័យដើម្បីតាមដានការវិវត្តនៃជំងឺរាតត្បាតផងដែរ ដោយនៅមានកម្រិតខ្សោយខ្លាំង។
សូមជម្រាបថា នៅទ្វីបអាហ្វ្រិក ក្នុងចំណោមមនុស្ស ១០០ នាក់ បានទទួលវ៉ាក់សាំងការពារជំងឺកូវីដ-១៩ត្រឹម ១៤ នាក់ប៉ុណ្ណោះ៕