NATO ចង់ពង្រឹងសមត្ថភាពការពារលើទឹកដីទាំងមូលរបស់សម្ព័ន្ធមិត្ត ដើម្បីត្រៀមខ្លួនទប់ទល់នឹងជម្លោះនៅអ៊ុយក្រែន
ឡុងដ៍ ៖ អគ្គលេខាធិការអង្គការណាតូ (NATO) លោក Jens Stoltenberg បាននិយាយ កាលពីថ្ងៃច័ន្ទថា ណាតូ ចង់ពង្រឹងសមត្ថភាពការពាររបស់ខ្លួននៅភាគខាងកើត និងទូទាំងទឹកដីទាំងមូលនៃសម្ព័ន្ធមិត្ត ដើម្បីជាការត្រៀមខ្លួនទប់ទល់នឹងការគំរាមកំហែងពីគ្រប់ទិសទី ជាពិសេសជម្លោះនៅក្នុងប្រទេសអ៊ុយក្រែន។
លោក Stoltenberg បានប្រាប់កាសែត ABC របស់អេស្ប៉ាញថា ជម្លោះនៅអ៊ុយក្រែន គឺគ្មាននរណាម្នាក់អាចទាយដឹងនោះទេ ប៉ុន្តែយើងគួរតែត្រៀមខ្លួនឲ្យល្អ។ លោក បញ្ជាក់ថា ណាតូនឹងចាប់ផ្តើមឈានទៅរកកិច្ចសហប្រតិបត្តិការស៊ីជម្រៅជាមួយសហភាពអឺរ៉ុប (EU) និងបណ្តាប្រទេសក្នុងតំបន់ឥណ្ឌូប៉ាស៊ីហ្វិក នៅឯកិច្ចប្រជុំកំពូល ក្នុងទីក្រុង Madrid ដែលគ្រោងនឹងធ្វើឡើងនៅថ្ងៃទី ២៩ ដល់ថ្ងៃទី ៣០ ខែមិថុនា ខាងមុខ។
លោកបន្តថា ប្រទេសហ្វាំងឡង់ និងស៊ុយអែត ក៏អាចនឹងចូលរួមក្នុងកិច្ចប្រជុំកំពូលនេះផងដែរ ហើយវានឹងក្លាយជាថ្ងៃប្រវត្តិសាស្ត្ររបស់ប្រទេសទាំង ២ សម្រាប់សមាជិកភាពជាមួយណាតូ៕