នាវាផ្ទុកយន្តហោះអាមេរិក ត្រូវបានដាក់ពង្រាយឡើងវិញនៅសមុទ្រចិនខាងត្បូង ខណៈភាពតានតឹងកំពុងកើនឡើង
វ៉ាស៊ីនតោន ៖ នាវាផ្ទុកយន្តហោះ USS Ronald Reagan និងក្រុមវាយប្រហាររបស់សហរដ្ឋអាមេរិក ត្រូវបានដាក់ពង្រាយឡើងវិញទៅកាន់សមុទ្រចិនខាងត្បូង ស្របពេលមានភាពតានតឹងជុំវិញដំណើរទស្សនកិច្ចរបស់ប្រធានសភា លោកស្រី Nancy Pelosi ទៅកាន់កោះតៃវ៉ាន់។
ក្រសួងការបរទេសរបស់ប្រទេសចិន បានចោទប្រកាន់ទីក្រុងវ៉ាស៊ីនតោន ម្តងទៀតថា កំពុងបង្កបញ្ហាឲ្យកាន់តែក្ដៅ ប៉ុន្តែមេបញ្ជាការកងទ័ពជើងទឹកសហរដ្ឋអាមេរិក លោក Hayley Sims បានទទូចថា នាវា Reagan នេះគឺស្ថិតនៅលើប្រតិបត្តិការធម្មតា ដោយបានកំណត់ពេលវេលានៃការល្បាតតាមធម្មតាប៉ុណ្ណោះ។
ទន្ទឹមនោះ មន្ត្រីអាមេរិក បានចោទប្រកាន់ទីក្រុងប៉េកាំង កាលពីថ្ងៃអង្គារ ពីអាកប្បកិរិយាឈ្លានពាន និងគ្មានការទទួលខុសត្រូវលើបញ្ហាកោះតៃវ៉ាន់ ខណអ្នកនាំពាក្យក្រសួងការបរទេសចិន លោក Zhao Lijian បានឆ្លើយតប ចំពោះទង្វើរបស់សហរដ្ឋអាមេរិកថា ច្បាស់ណាស់ នេះគឺជាការគំរាមកំហែងដ៏ធំបំផុតចំពោះសមុទ្រចិនខាងត្បូង និងសន្តិភាព និងស្ថិរភាពក្នុងតំបន់អាស៊ី៕