អាមេរិកគ្រោងចំណាយជាង១ពាន់លានដុល្លារ ទិញថ្នាំគ្រាប់ការពារកូវីដពីក្រុមហ៊ុន Merck
វ៉ាស៊ីនតោន ៖ ក្រុមហ៊ុន Merck បានឲ្យដឹងកាលពីថ្ងៃអង្គារថា រដ្ឋាភិបាលសហរដ្ឋអាមេរិកនឹងចំណាយថវិកាជាង១ពាន់លានដុល្លារ ដើម្បីទិញថ្នាំគ្រាប់ការពារជំងឺកូវីដ១៩ ដែលផលិតដោយក្រុមហ៊ុន Merck & Co Inc (MRK.N) និងដៃគូក្រុមហ៊ុន Ridgeback Biotherapeutics ។
ក្រុមហ៊ុន Merck បានបញ្ជាក់ថា រដ្ឋាភិបាលសហរដ្ឋអាមេរិកគឺមានសិទ្ធិទិញចំនួនជាង ២ លានបន្ទះបន្ថែមទៀត ដោយស្របតាមកិច្ចសន្យា។ ដូចនេះ អាមេរិកទិញថ្នាំគ្រាប់នេះអស់ចំនួន ៣.១លានបន្ទះ ដែលគិតជាប្រាក់គឺអស់២.២ពាន់លានដុល្លារ។
រដ្ឋាភិបាលអាមេរិក កាលពីខែ មិថុនា កន្លងទៅ ក៏ធ្លាប់បានយល់ព្រមទិញថ្នាំគ្រាប់ Molnupiravir ចំនួន ១.៧ លានបន្ទះផងដែរ ក្នុងតម្លៃ ១.២ ពាន់លានដុល្លារ ហើយឥឡូវនេះកំពុងដាក់បញ្ជាទិញ ១.៤ លានបន្ទះបន្ថែមទៀត។
សូមជម្រាបថា ថ្នាំគ្រាប់ការពារជំងឺកូវីដ ១៩ Molnupiravir នេះ ត្រូវបានអាជ្ញាធរសុខាភិបាលតាមដានយ៉ាងយកចិត្តទុកដាក់ ចាប់តាំងពីខែមុន ដោយទិន្នន័យសាកល្បងបានបង្ហាញថា វាមានប្រសិទ្ធភាពអាចកាត់បន្ថយអត្រានៃការស្លាប់ ឬធ្ងន់ធ្ងរបានប្រមាណ ៥០ ភាគរយ សម្រាប់អ្នកដែលប្រឈមហានិភ័យខ្ពស់បំផុតនៅពេលឆ្លងកូវីដ ១៩ ៕