ក្រសួងសុខាភិបាលថៃណែនាំឲ្យធ្វើតេស្តរកកូវីដតាមម៉ាស៊ីនធំ PCR ជៀសវាងតាមឧបករណ៍តេស្តរហ័ស
បាងកក ៖ ក្រសួងសុខាភិបាលថៃ បានណែនាំឲ្យកន្លែងប្រកបអាជីវកម្ម និងសាលារៀន គួរតែប្រើតែឧបករណ៍តេស្តរហ័សរកកូវីដ១៩ ណាដែលត្រូវបានអនុម័តដោយរដ្ឋបាលចំណីអាហារ និងឱសថ (FDA) ប៉ុណ្ណោះ។
លោក Suphakit Sirilak អគ្គនាយកនៃនាយកដ្ឋានវិទ្យាសាស្ត្រវេជ្ជសាស្ត្រថៃបាននិយាយថា កន្លងមកឧបករណ៍ទាំងនេះមានភាពងាយស្រួល និងមានតម្លៃថោក ប៉ុន្តែលទ្ធផលគឺអាចនឹងមិនច្បាស់លាស់ គួរឲ្យទុកចិត្តខ្លាំងនោះទេ។ លោកបញ្ជាក់ថា អ្នកដែលជាប់ពាក់ព័ន្ធនឹងអ្នកឆ្លងកូវីដ ១៩ គឺត្រូវរង់ចាំពី៣ ទៅ៥ថ្ងៃ មុននឹងធ្វើតេស្ត ប៉ុន្តែអ្នកដែលមានគ្រុនក្តៅ ផ្តាសាយ ឬក្អក អាចធ្វើតេស្តបានភ្លាមៗ។
លោក បានបញ្ជាក់បន្ថែមថា ប្រសិនបើការធ្វើតេស្តចេញមកវិជ្ជមានច្រើននៅក្នុងកន្លែងតែមួយនោះ អ្នកទាំងនោះមិនគួរឲ្យធ្វើចត្តាឡីស័កភ្លាមៗ នោះទេ ដោយត្រូវតែទៅធ្បើតេស្តនៅម៉ាស៊ីនធំ RT-PCR បន្តទៀត ទើបអាចយកលទ្ធផលជាផ្លូវការបាន៕