រ៉ង់ហ្គូន ៖ តុលាការនៅក្រោមរបបយោធាមីយ៉ាន់ម៉ា នៅថ្ងៃសុក្រនេះបានផ្ដន្ទាទោសអ្នកកាសែតអាមេរិកម្នាក់ គឺលោក Danny Fenster ដាក់ពន្ធនាគារ១១ឆ្នាំ ដែលនេះជាការ បិទបញ្ចប់កិច្ចខិតខំប្រឹងប្រែងរបស់សហរដ្ឋអាមេរិក ដែលទាមទារឱ្យដោះលែងរូបលោក។ នេះបើតាមការចេញផ្សាយដោយទីភ្នាក់ងារសារព័ត៌មាន Reuters នៅថ្ងៃសុក្រ ទី១២ ខែវិច្ឆិកា ឆ្នាំ២០២១។

លោក Fenster ដែលជា​នាយក​គ្រប់គ្រង​កាសែត​អន​ឡាញ Frontier Myanmar ត្រូវបាន​ចាប់ខ្លួន នៅពេលដែល​លោក បាន​ព្យាយាម​ចាកចេញ​ពី​ប្រទេស កាលពី​ខែ ឧសភា ដែល​តុលាការ បានសម្រេច​ឃុំខ្លួន​លោក​បណ្ដោះអាសន្ន នៅក្នុង​ពន្ធនាគារ Insein នៅក្នុង​ទីក្រុង Yangon រងចាំ​ការកាត់ក្ដី​។​

គួរ​បញ្ជាក់ថា លោក Fenster ត្រូវបាន​ចោទប្រកាន់​ពីបទ​ញុះញង់ បំពាន​ច្បាប់​អន្តោប្រវេសន៍ និង​ច្បាប់​សមាគម​ខុសច្បាប់​។ ទន្ទឹម​នោះ លោក​ត្រូវបាន​រង​ការចោទប្រកាន់ នាពេល​ថ្មីៗ​នេះ​បន្ថែមទៀត ពាក់ព័ន្ធ​នឹង​ការបះបោរ និង​ការរំលោភច្បាប់​ភេរវកម្ម ដែល​ត្រូវ​ផ្តន្ទាទោស​ឲ្យ​ជាប់ពន្ធនាគារ​រយៈពេល ២០ ឆ្នាំ​ផងដែរ​៕