រុស្ស៊ី ៖ អ្នកដែលមិនចាក់វ៉ាក់សាំងការពារកូវីដ មិនអាចទិញគ្រឿងស្រវឹងបានទេ
ម៉ូស្គូ ៖ រដ្ឋាភិបាលរុស្ស៊ីបានឲ្យដឹងកាលពីថ្ងៃសៅរ៍ថា ជនជាតិរុស្ស៊ីរូបណាដែលមិនចាក់វ៉ាក់សាំងការពារជំងឺកូវីដ១៩ ប្រហែលជាគ្មានសិទ្ធិអាចទិញគ្រឿងស្រវឹងបាននោះទេ។ ទីភ្នាក់ងារគ្រប់គ្រងជំងឺឆ្លងរុស្ស៊ី នៅក្នុងតំបន់ Sverdlovsk កំពុងពិចារណាក្នុងការរារាំង រាល់ការលក់គ្រឿងស្រវឹងដល់មនុស្សដែលមិនមាន QR code ដែលបញ្ជាក់ថា ពួកគេបានចាក់វ៉ាក់សាំងរួចរាល់។
លោក Artyom Bakhterev រដ្ឋមន្ត្រីប្រចាំតំបន់កសិឧស្សាហកម្មក្នុងតំបន់ Sverdlovsk បាននិយាយថា យើងបានដឹងពីគំនិតផ្តួចផ្តើមនៃចំណាត់ការនេះ ដូច្នេះយើងបានត្រៀមខ្លួនរួចជាស្រេច ដើម្បីពិភាក្សាអំពីវិធានការនេះ ជាមួយសហការី និងអ្នកជំនាញនៅក្នុងកិច្ចប្រជុំបន្ទាប់ នៃទីស្នាក់ការកណ្តាលប្រតិបត្តិការ។ លោកថា គំនិតផ្ដួចផ្ដើមនេះ អាចលើកទឹកចិត្ត និងជំរុញឲ្យប្រជាជនរុស្ស៊ីទាំងអស់បានទទួលការចាក់វ៉ាក់សាំងការពារជំងឺកូវីដ ១៩ ផងដែរ។
សូមជម្រាបថា ចាប់តាំងពីខែ តុលា មក តំបន់ជាច្រើននៅក្នុងប្រទេសរុស្ស៊ី ត្រូវបានរឹតបន្តឹងដើម្បីដោះស្រាយវិបត្តិមេរោគឆ្លង តាមរយៈប្រព័ន្ធ QR code ស្គេន៕