NATO ជំរុញឱ្យរុស្ស៊ី បន្តកិច្ចព្រមព្រៀងគ្រាប់ធញ្ញជាតិអ៊ុយក្រែន
មូស្គូ ៖ អង្គការណាតូ បានអំពាវនាវឱ្យរុស្ស៊ី ពិនិត្យមើលឡើងវិញនូវការសម្រេចចិត្តរបស់ខ្លួនលើការផ្អាកការចូលរួម នៅក្នុងកិច្ចព្រមព្រៀងគ្រាប់ធញ្ញជាតិអ៊ុយក្រែន និងស្ដារវាឡើងវិញជាបន្ទាន់។ នេះបើយោងតាមរបាយការណ៍របស់ Reuters ។
ទីភ្នាក់ងារនេះ បានដកស្រង់សម្តីអ្នកនាំពាក្យរបស់អង្គការណាតូ លោក Oana Lungescu បាននិយាយថា យើងសូមអំពាវនាវឱ្យរុស្ស៊ី ពិចារណាឡើងវិញនូវការសម្រេចចិត្តរបស់ខ្លួន និងបន្តកិច្ចព្រមព្រៀងជាបន្ទាន់ ដើម្បីសម្រួលឱ្យមានស្បៀងដល់អ្នកដែលត្រូវការ។ ទីភ្នាក់ងារដដែល បានបញ្ជាក់ថា សម្ព័ន្ធមិត្ត ក៏បានអំពាវនាវឱ្យរុស្ស៊ី ឈប់ប្រើប្រាស់អាហារជាអាវុធក្នុងសង្គ្រាម។
ជាមួយគ្នានេះ ក្រសួងការពារជាតិរុស្ស៊ី បានលើកឡើង កាលពីថ្ងៃសៅរ៍ថា បន្ទាប់ពីការវាយប្រហារភេរវកម្មប្រព្រឹត្តដោយរបបក្រុងគៀវ និងមានការចូលរួមពីបរទេស ប្រឆាំងនឹងកងនាវាចរសមុទ្រខ្មៅរបស់ទីក្រុងមូស្គូ និងកប៉ាល់ស៊ីវិលដែលចូលរួម ដើម្បីធានាសន្តិសុខនៃច្រករបៀងគ្រាប់ធញ្ញជាតិ ទើបធ្វើឲ្យភាគីរុស្ស៊ី ផ្អាកការចូលរួមរបស់ខ្លួន។
សូមជម្រាបថា ទីក្រុងមូស្គូបានប្រកាសផ្អាកការចូលរួមរបស់ខ្លួន នៅក្នុងកិច្ចព្រមព្រៀងសំខាន់មួយ ដែលអនុញ្ញាតឱ្យ គ្រាប់ធញ្ញជាតិអាចត្រូវនាំចេញពីកំពង់ផែរបស់អ៊ុយក្រែន ក្រោមហេតុផលថា ក្រុមនាវាយោធារុស្ស៊ីបានទទួលរង ការវាយប្រហារដោយដ្រូន នៅឯតំបន់គ្រីមៀ៕