រដ្ឋមន្រ្តីកសិកម្មចុះ​ពិនិត្យ​កសិដ្ឋាន​ចិញ្ចឹម​គោ​បង្កាត់​សិប្បនិម្មិត​ជា​លក្ខណៈ​គ្រួសារ​ និង​កសិដ្ឋាន​ចិញ្ចឹម​ជ្រូក​-​មាន់នៅ​ខេត្តកំពង់ធំ​

ខេត្តកំពង់ធំ ៖ ឯកឧត្តម ឌិត ទីណា រដ្ឋមន្ត្រី​ក្រសួងកសិកម្ម រុក្ខាប្រមាញ់ និងនេសាទ បាន​ចុះទៅ​ពិ​និត្យកសិដ្ឋាន​ចិញ្ចឹម​គោ​បង្កាត់​សិប្បនិម្មិត​ជា​លក្ខណៈ​គ្រួសារ​របស់លោក សេង សុក​ចិ​ត្រា នៅ​ភូមិ​ព្រៃ​ស្រ​ង៉ែ ឃុំ​ប​ល័​ង្គ ស្រុក​បារាយណ៍ ខេត្តកំពង់ធំ​។

ក្រោយពី​បាន​ស្តាប់​របាយការណ៍​បច្ចេក​ទេស​របស់​ម្ចាស់​កសិដ្ឋាន ឯកឧត្តមរដ្ឋមន្រ្តី​ក៏បាន​ទទួលយក​សំណូមពរ​ពី​ម្ចាស់​កសិក​ដ្ឋា​ន ដែល​ស្នើឱ្យ​ក្រសួងកសិកម្ម រុក្ខាប្រមាញ់ និង​នេសាទ​ធ្វើការ​ផ្សព្វផ្សាយ​ជូន​កសិករ​យល់ដឹង​ឱ្យ​ទូលំទូលាយ​ក្នុងការ​ចិញ្ចឹម​គោ​សិប្បនិម្មិត​។​

បន្ទាប់មក នា​ថ្ងៃ​ជាមួយគ្នា​នោះ ឯកឧត្តម​ក៏បាន​ចុះទៅពិនិត្យ​កសិដ្ឋាន​ចិញ្ចឹម​ជ្រូក​និង​មាន់​សាច់​របស់​ក្រុមហ៊ុន CP សាខា​ខេត្តកំពង់ធំ របស់លោក ងី គីម​ពៅ នៅ​ភូមិ​អូរ​កោះ​គគី ឃុំ​ជ្រប់ ស្រុក​សន្ទុក ខេត្តកំពង់ធំ ដែលមាន​សមត្ថភាព​ផលិត​ជ្រូក​បាន​ចំនួន ៩ ០០០​ក្បាល​និង​មាន់​ចំនួន ៧០ ០០០​ក្បាល​/​វគ្គ​ចិញ្ចឹម​។

ក្រៅពី​បាន​ស្វែងយល់​ពី​ចំណុចខ្លាំង ចំណុចខ្សោយ ឱកាស និង​បញ្ហា​ប្រឈម​ក្នុងការ​ចិញ្ចឹម ក៏ដូចជា​ប្រសិទ្ធភាព​សេដ្ឋកិច្ច លោក​ក៏បាន​ជូន​យោបល់​ដល់​ម្ចាស់​កសិដ្ឋាន​អំពី​បញ្ហា​អគ្គិសនី ដោយបាន​ណែនាំ​ឱ្យ​ម្ចាស់​កសិដ្ឋាន​ទៅ​ស្នើសុំ​ប្រើប្រាស់​អគ្គិសនី​សម្រាប់​បម្រើឱ្យ​វិស័យ​កសិកម្ម​ដែលមាន​តម្លៃថោក​ជាង​តម្លៃ​អគ្គីសនី​ធម្មតា​៕