មន្ទីរបញ្ចកោណ ព្រួយបារម្ភចំពោះកម្មវិធីនុយក្លេអ៊ែររបស់ចិន
វ៉ាស៊ីនតោន ៖ មន្ទីរបញ្ចកោណបានព្រមានថា ប្រទេសចិនកំពុងបង្កើនសមត្ថភាពអាវុធនុយក្លេអ៊ែររបស់ខ្លួនយ៉ាងឆាប់រហ័ស ហើយកំពុងឈានទៅដល់ជិតបួនដងនៃចំនួនក្បាលគ្រាប់នៅក្នុងឃ្លាំងអាវុធរបស់ខ្លួននៅឆ្នាំ ២០៣៥ ដោយកាត់បន្ថយគម្លាតកម្លាំងអាវុធជាមួយសហរដ្ឋអាមេរិក។
មន្ទីរបញ្ចកោណបានបង្ហាញឲ្យដឹងកាលពីថ្ងៃអង្គារនៅក្នុងរបាយការណ៍ប្រចាំឆ្នាំរបស់ខ្លួនស្តីពីកម្លាំងយោធារបស់ប្រទេសចិនថា “ក្នុងរយៈពេលមួយទសវត្សរ៍ក្រោយ PRC (សាធារណៈរដ្ឋប្រជាមានិតចិន) មានគោលបំណងធ្វើទំនើបកម្ម ធ្វើពិពិធកម្ម និងពង្រីកកងកម្លាំងនុយក្លេអ៊ែររបស់ខ្លួន”។ របាយការណ៍បានបន្ថែមថា ការសាងសង់នេះមានទំហំធំ និងស្មុគស្មាញជាងគំនិតផ្តួចផ្តើមទំនើបកម្មនុយក្លេអ៊ែរដែលចិនបានធ្វើកាលពីមួយទសវត្សរ៍មុនទៅទៀត។
មន្ទីរបញ្ចកោណបានបន្តថា បច្ចុប្បន្នទីក្រុងប៉េកាំងមានក្បាលគ្រាប់នុយក្លេអ៊ែរប្រហែល ៤០០ ក្បាល កើនឡើងពីការប៉ាន់ប្រមាណពីមុន ៣៥០ ។ ចំណែកល្បឿននៃការអភិវឌ្ឍន៍ ឃ្លាំងស្តុកនឹងកើនឡើងដល់ប្រហែល ១០០០ ក្បាលគ្រាប់នៅចុងទសវត្សរ៍នេះ និងដល់ ១៥០០ នៅឆ្នាំ ២០៣៥។ តាមការប្រៀបធៀប អាមេរិកមានក្បាលគ្រាប់សកម្មចំនួន ៣.៧៥០ និងឃ្លាំងស្តុកសរុបជាង ៥.០០០ គ្រាប់ប៉ុណ្ណោះ។
តាមមន្ទីរបញ្ចកោណ ការពង្រីករបស់ចិនទំនងជានឹង “លឿនជាងការវិវឌ្ឍន៍សក្តានុពលដោយកងកម្លាំងនុយក្លេអ៊ែររបស់សត្រូវដែលអាចគំរាមកំហែងដល់សមត្ថភាពរបស់ PRC ក្នុងការសងសឹកប្រឆាំងនឹងការវាយប្រហារលើកដំបូង” ដោយបន្ថែមថា យោធារបស់ប្រទេសចិនមានបំណងមានសមត្ថភាពសម្រាប់ “ការបំផ្លិចបំផ្លាញដោយធានាទៅវិញទៅម ដោយបំបាក់ទឹកចិត្តអ្នកវាយប្រហារណាម្នាក់។
ឧត្តមសេនីយរបស់អាមេរិកបានចង្អុលបង្ហាញម្តងហើយម្តងទៀតទៅកាន់ប្រទេសចិនថាជាការគំរាមកំហែងដល់កម្រិតកំពូលចំពោះសន្តិសុខជាតិរបស់សហរដ្ឋអាមេរិកដោយនិយាយថាទីក្រុងប៉េកាំងគឺជា “គូប្រជែងតែមួយគត់នៅទីនោះដែលមានទាំងចេតនាក្នុងការរៀបចំឡើងវិញនូវសណ្តាប់ធ្នាប់អន្តរជាតិ និងកាន់តែមានអំណាចដើម្បីធ្វើដូច្នេះ” ។
មន្ត្រីចិនបានច្រានចោលនូវការព្រួយបារម្ភបែបនេះ ដោយនិយាយថាទីក្រុងវ៉ាស៊ីនតោនមាន “ចិត្តគំនិតសង្គ្រាមត្រជាក់ហួសសម័យ និងផ្នត់គំនិតអវិជ្ជមាន”។
មន្ត្រីសហរដ្ឋអាមេរិកបានសម្តែងការព្រួយបារម្ភថា នៅពេលដែលសមត្ថភាពនុយក្លេអ៊ែររបស់ចិនកាន់តែរីកចម្រើន មេដឹកនាំរបស់ប្រទេសអាចនឹងគិតឡើងវិញអំពីគោលនយោបាយរបស់ពួកគេប្រឆាំងនឹងការបើកការវាយប្រហារនុយក្លេអ៊ែរជាលើកដំបូង។ មន្ត្រីការពារជាតិជាន់ខ្ពស់ម្នាក់បាននិយាយនៅក្នុងសន្និសីទសារព័ត៌មាន មុនពេលរបាយការណ៍កាលពីថ្ងៃអង្គារត្រូវបានចេញផ្សាយថា “អ្វីដែលយើងកំពុងមើលនៅទីនេះ វាបង្កើតជាសំណួរមួយចំនួន ខ្ញុំគិតថាអំពីចេតនារបស់ពួកគេ”។ សម្រាប់ ទីក្រុងវ៉ាស៊ីនតោនបានបដិសេធមិនច្រានចោលជម្រើសនៃការវាយប្រហារលើកដំបូងរបស់ខ្លួន ឬលទ្ធភាពនៃការប្រើប្រាស់អាវុធនុយក្លេអ៊ែរប្រឆាំងនឹងការគំរាមកំហែងមិនមែននុយក្លេអ៊ែរនោះទ្បើយ៕