មេនឆឺស្ទើ ៖ ក្រុម​បិសាច​ក្រហម Manchester United បានបញ្ជាក់​ពី​ការតែងតាំង​លោក Ralf Rangnick ជា​អ្នកចាត់ការ​បណ្ដោះសន្ន​ជា​ផ្លូវការ​ហើយ​កាលពី​យប់មិញ​។​

​អតីត​គ្រូបង្វឹក​ក្រុម RB Leipzig នឹង​ជំនួស​កន្លែង​លោក Ole Gunnar Solskjaer សម្រាប់​រដូវ​កាលដែល​នៅសល់​ឆ្នាំ ២០២១-២២ បន្ទាប់ពី​ចាកចេញ​ពី​តួនាទី​ជា​ប្រធាន​ផ្នែក​កីឡា និង​អភិវឌ្ឍន៍​នៅ​ក្រុម Lokomotiv Moscow ។​

​លោក Rangnick គ្រោង​នឹង​ផ្លាស់​ទៅធ្វើជា​ទីប្រឹក្សា​រយៈពេល ២ ឆ្នាំ​នៅ Old Trafford បន្ទាប់ពី​ចប់​តំណែង​នេះ ហើយ​មាន​រំពឹងថា​លោក​នឹង​ត្រូវគេ​តែងតាំង​គ្រូបង្វឹក​អចិន្ត្រៃយ៍​ថ្មី​នៅ​រដូវក្តៅ​ក្រោយ​។​

​គួរបញ្ជាក់​ផងដែរ​ថា លោក Rangnick ជា​អ្នកដឹកនាំ​ក្លឹប​ដ៏​មានបទពិសោធន៍​យូរ​ឆ្នាំ​មួយរូប​នេះ ដែល​ត្រូវបាន​គេ​ស្គាល់​ថា​ជា​គ្រូ​របស់លោក Thomas Tuchel ក៏ដូចជា Jurgen Klopp ផងដែរ​៕