កុំភ្លេចយប់នេះ! កម្ពុជា ប៉ះទីម័រ វគ្គសន្សំពិន្ទុពូល A នៃព្រឹត្តិការណ៍ស៊ីហ្គេម
ភ្នំពេញ ៖ ក្រុមជម្រើសជាតិកម្ពុជាក្រោមអាយុ២២ឆ្នាំ នឹងត្រូវតតាំងជាមួយក្រុមទីម័រខាងកើត ក្នុងពូល A នៃវគ្គសន្សុំពិន្ទុ ព្រឹត្តិការណ៍ស៊ីហ្គេមលើកទី៣២ ដែលកម្ពុជាធ្វើជាម្ចាស់ផ្ទះ វេលាម៉ោង៧៖០០នាទីយប់នៅពហុកីឡដ្ឋានជាតិអូឡាំពិត។
យ៉ាងណាមិញមុនការប្រកួតក្នុងនាមជាម្ចាស់ផ្ទះ លោក Ryu Hirose គ្រូបង្គោលក្រុម U22កម្ពុជា បានមានប្រសាសន៍ ថា៖ «ជាបឋមយើងសូមស្វាគមន៍ និងអរគុណសម្រាប់ការចូលរួម ក្នុងនាមជាម្ចាស់ផ្ទះ ដោយយើងមានមោទនភាព ដែលទទួលស្វាគមន៍ព្រឹត្តិការណ៍ដ៏អស្ចារ្យមួយនេះ»។
គ្រូបង្វឹកជនជាតិជប៉ុនរូបនេះ បានបន្ថែមថា៖ «មិនមែនតែព្រឹត្តិការណ៍នេះទេ ព្រឹត្តិការណ៍ផ្សេងៗទៀតក៏ដូចគ្នា គឺពិតជាមានការពិបាក សម្រាប់ការប្រកួតដំបូង ដូច្នេះយើងត្រៀមរៀបចំ សម្រាប់ការប្រកួតថ្ងៃ នៅថ្ងៃស្អែក។ បើទោះបីជាយើងជួបក្រុមប្រហាក់ប្រហែលគ្នាពីព្រឹត្តិការណ៍មុនៗក៏ដោយ តែចំណុចសំខាន់របស់ក្រុម គឺយើងត្រូវគ្រប់គ្រងស្ថានការណ៍លេងឱ្យបានល្អ»។
ចំណែក បុរសជនជាតិកូរ៉េខាងត្បូង លោក Park Soon Tae ជាគ្រូ U22 ទីម័រខាងកើត បាននិយាយថា៖ «យើងពិតជារីករាយ ដែលបានមកទីនេះ។ យើងដឹងថា នេះជាស៊ីហ្គេម លើកទី៣២ នៅកម្ពុជា យើងនឹងយកឱកាស ក៏ដូចជាបទពិសោធន៍ សម្រាប់ព្រឹត្តិការណ៍នេះ។ នៅថ្ងៃស្អែក ជាការប្រកួតទល់នឹងម្ចាស់ផ្ទះ ហើយយើងដឹងថា អ្នកគាំទ្រកម្ពុជាមកពេញកីឡដ្ឋាន អ៊ីចឹងយើងនឹងលេងដោយភាពរីករាយ ឱ្យអស់ពីលទ្ធភាព ព្រោះយើងបានរៀបចំច្រើនខែមកហើយ»៕