ខេត្តសៀមរាប៖ ការប្រកួតកីឡាស៊ីហ្គេមប្រភេទអត្តពលកម្ម លើវិញ្ញាសាររត់ម៉ារ៉ាតុងបុរស-នារី ក្នុងខេត្តសៀមរាប បានចាប់ផ្តើមដំណើរការហើយ នៅវេលាម៉ោង៦ព្រឹកថ្ងៃទី៦ ខែឧសភា ឆ្នាំ២០២៣នេះ ក្នុងរយៈចម្ងាយប្រវែង ៤២,១៩៥ គីឡូម៉ែត្រ ដោយការវិលជុំ គឺចាប់ផ្ដើមពីមុខប្រាសាទអង្គរវត្ត ដល់ខ្លោងទ្វារដៃឆ្នាំ ខាងជើងប្រាសាទបាយ័ន រួចបត់ត្រឡប់មកវិញ ដោយការវិលជុំ។

អត្តពលិកចំនួន២២រូប ផ្នែកបុរស១១រូប ផ្នែកនារី១១រូប មកពី៩ប្រទេសចូលរួម ខណៈដែលឡាវ និងព្រុយណេ អវត្តមាន។

ដោយឡែកការប្រកួតលើវិញ្ញាសាដើរប្រណាំង (បុរស-នារី ) ចំងាយ២០ គីឡូម៉ែត្រ នឹងចាប់ផ្តើមនៅម៉ោង៤រសៀលថ្ងៃទី៦ ខែឧសភា ឆ្នាំ២០២៣នេះ ដោយមានអត្តពលិកចំនួន១៥រូបចូលរួមផងដែរ។

សូមបញ្ជាក់ផងដែរ វិញ្ញាសាអត្តពលកម្ម ក្នុងខេត្តសៀមរាប មានរយៈពេលមួយថ្ងៃ គឺនៅថ្ងៃទី៦ ខែ ឧសភា ឆ្នាំ២០២៣នេះ ការប្រកួតមានវិញ្ញាសារត់ម៉ារ៉ាតុង និងដើរប្រណាំង នៅបរិវេនខាងមុខប្រាសាទអង្គរវត្ត ៕