ភ្នំពេញ៖ សម្ដេចតេជោ ហ៊ុន សែន នាយករដ្ឋមន្ត្រីកម្ពុជា បានប៉ាន់ប្រមាណថាការលើកលែងពន្ធគ្រប់យ៉ាងលើកលែងតែអាវុធពីសហភាពអឺរ៉ុបមកកម្ពុជាអាចនឹងបាត់បង់នៅឆ្នាំ២០២៧ ក្នុងពេលនៅកម្ពុជាបានបញ្ចប់ឋានៈជាប្រទេសមានការអភិវឌ្ឍន៍តិចតួច។

ក្នុងពិធីជួបជាមួយនឹងកម្មករជាង ១ម៉ឺន ៦ពាន់នាក់នៅស្រុងគងពិសី ខេត្តកំពង់ស្ពឺព្រឹកថ្ងៃទី៤ ខែមិថុនា ឆ្នាំ២០២៣នេះ សម្ដេចតេជោ ហ៊ុន សែន បានលើកឡើងថា តាមរយៈការដកហូតពន្ធ ២០% ពីកម្ពុជាក្នុងប្រព័ន្ធ EBA កាលពីកន្លងទៅ គឺបានបង្ហាញពីភាពធន់នៃការនាំចេញផងដែរ ដូច្នេះយូរនឹងឆាប់ការដកប្រព័ន្ធអនុគ្រោះពន្ធ EBA ១០០% ពីកម្ពុជានឹងកើតមានហើយកម្ពុជានៅតែរក្សាបាននូវភាពធន់ទាំងនេះ។

សម្ដេចថា៖ «អាមិនបង់ពន្ធក៏យើងនាំទៅបានអាបង់ពន្ធក៏យើងនាំទៅបានវាគ្រាន់តែចំណេញតិចជាង»។ សម្ដេចតេជោ ហ៊ុន សែន បានមានប្រសាសន៍ថាកម្ពុជាត្រូវតែពង្រឹងភាពធន់របស់ខ្លួនចាប់ពីពេលឥឡូវនេះទៅ ។

សម្តេចតេជោរំលឹកថា សម្តេចបានធ្វើជាសហប្រធានកិច្ចប្រជុំអាស៊ានអឺរ៉ុបពេល នោះសម្តេចបានហាមមន្ត្រីរបស់សម្តេចមិនឲ្យនិយាយអំពីការដកអ៊ីប៊ីអេ២០ភាគរយនេះទេ។

សម្តេចតេជោបន្តថា សម្តេចធ្លាប់បានប្រ កាសតាំងពីពេលមុនថាសម្តេចមិនយកអធិបតេយ្យភាពរបស់កម្ពុជាទៅដោះដូរជាមួយនឹងជំនួយឬការអនុគ្រោះណា មួយឡើយ ។ សម្តេចបានលើកសំណួរទៀតថា “ឥឡូវលើការជាក់ស្ដែងតើកម្ពុជាបានងាប់ ហើ យឬនៅ ? អាក្មេងពាលនៅក្រៅស្រុក។ តើកម្ពុជាបានងាប់ហើយឬនៅវាអត់ទាន់ងាប់ទេអាពៅ។បើវាមិនងាប់មានតែពួកឯងហ្នឹងងាប់។ឯងត្រូវយល់ឲ្យច្បាស់ ។

កម្ពុជាមានគម្រោងក្នុងការបញ្ចប់ឋានៈជាប្រទេសអភិវឌ្ឍន៍តិចតួចរបស់ខ្លួននៅឆ្នាំ២០២៨ ដើម្បីសម្រេចបាននូវស្ថានភាពចំណូលមធ្យមកម្រិតខ្ពស់នៅឆ្នាំ ២០៣០ និងចំណូលខ្ពស់នៅឆ្នាំ២០៥០ តាមរយៈការពង្រីកទីផ្សារទៅក្រៅប្រទេសដែលរួមមានកិច្ចព្រមព្រៀងពាណិជ្ជកម្មសេរីមួយចំនួនដែលបានសម្រេចរួចកន្លងមក៕