
កូរ៉េខាងជើង ធ្វើសមយុទ្ធហាត់សមវាយប្រហារនុយក្លេអ៊ែរតាក់ទិកលើកូរ៉េខាងត្បូង
ប្រភព៖ AFP
សេអ៊ូល៖ យោធាកូរ៉េខាងជើងបានដឹកនាំការធ្វើ សមយុទ្ធហាត់សមវាយប្រហារនុយក្លេអ៊ែរតាក់ទិក លើគោលដៅនានាក្នុងប្រទេសកូរ៉េខាងត្បូង ជាការឆ្លើយតបទៅនឹងសមយុទ្ធយោធារួមគ្នារវាងទីក្រុង វ៉ាស៊ីនតោន និងទីក្រុងសេអ៊ូល។
ការធ្វើតេស្ដមីស៊ីលចុងក្រោយបំផុតខាងលើរបស់កូរ៉េខាងជើង កើតមានឡើងមួយថ្ងៃ មុននឹងសហរដ្ឋអាមេរិក និងកូរ៉េខាងត្បូងបិទបញ្ចប់ ការធ្វើសមយុទ្ធយោធារួមគ្នារយៈពេល១១ថ្ងៃ ដែលទីក្រុងព្យុងយ៉ាង ថ្កោលទោស និងចាត់ទុកថាជាការត្រៀមលក្ខណៈធ្វើសង្រ្គាមឈ្លានពានប្រឆាំងនឹង របបដឹកនាំលោក គីម ជុងអ៊ុន។
ប្រព័ន្ធផ្សព្វផ្សាយរដ្ឋកូរ៉េខាងជើង KCNA បានរាយការណ៍ដោយដកស្រង់សម្ដីពីអគ្គនាយសេនាធិការកងទ័ពប្រជាជនកូរ៉េខាងជើង (KPA) KCNA បានគូសបញ្ជាក់ថា KPA បានដឹកនាំការធ្វើសមយុទ្ធ ហាត់សមវាយប្រហារនុយក្លេអ៊ែរតាក់ទិក លើទីបញ្ជាការ និងព្រលានយន្ដហោះសំខាន់ៗរបស់យោធាកូរ៉េខាងត្បូង កាលពីយប់ថ្ងៃពុធម្សិលមិញ។
កាលពីយប់ថ្ងៃពុធម្សិលមិញនោះដែរ យោធាកូរ៉េខាងត្បូងបានអះអាងថាកូរ៉េខាងជើងបានបាញ់សាកល្បងមីស៊ីលបាលិស្ទីគរយៈចម្ងាយខ្លីចំនួន ២គ្រាប់ ចូលទៅក្នុងសមុទ្រ តែប៉ុន្មានម៉ោងប៉ុណ្ណោះ បន្ទាប់ពីសហរដ្ឋអាមេរិកដាក់ពង្រាយយន្ដហោះទម្លាក់គ្រាប់បែក B-1B ឱ្យចូលរួមក្នុងសមយុទ្ធរួមគ្នាជាមួយ សម្ព័ន្ធមិត្តរបស់ខ្លួន៕