ក្លឹបបាល់ទាត់វិសាខា ទទួលបានការឧបត្ថម្ភ ៣ឆ្នាំបន្តទៀតពីដៃគូក្នុងការអភិវឌ្ឍន៍ធនធានកីឡាករ
ភ្នំពេញ៖ ក្លឹបបាល់ទាត់វិសាខា ព្រឹកមិញនេះបានបន្តចុះអនុស្សារណៈយោគយល់គ្នា (MOU) រយៈពេល៣ឆ្នាំបន្តទៀតជាមួយធនាគារ ព្រីនស៍ ម.ក ដើម្បីអភិវឌ្ឍន៍កីឡាករ និងលើកស្ទួយវិស័យបាល់ទាត់នៅកម្ពុជា។
កញ្ញា អ៊ូ បញ្ញាសុកិត្យា នាយិកាគ្រប់គ្រងក្លឹបទាត់វិសាខា បានឲ្យដឹងថា ដោយសារតែមានគោលដៅដូចគ្នា គោលដៅតែមួយ របស់ធនាគារព្រីនស៍ និងក្លឹបបាល់ទាត់វិសាខា លើការអភិវឌ្ឍន៍វិស័យបាល់ទាត់នៅកម្ពុជាទើបនាំឲ្យមានជាការសហការគ្នាតាំងពីឆ្នាំ២០១៨ មកដល់ពេលបច្ចុប្បន្ននេះ។
អ្នកគ្រប់គ្រងរបស់វិសាខាខាងលើបន្ថែមទៀតថា តាមអ្វីដែលមើលឃើញនោះការជួយឧបត្ថម្ភ ឬការជ្រោមជ្រែងពីវិស័យឯកជនមកលើបាល់ទាត់មានការរីកចម្រើនពីមួយកម្រិតទៅមួយកម្រិតខុសប្លែកពីមុនមិនមែនតែក្លឹបបាល់ទាត់វិសាខានោះទេ ពោលក្លឹបដទៃក៏មានដូចគ្នា។
ជាមួយគ្នានេះដែរកញ្ញាក៏បានអំពាវនាវដល់ប្រជាជនកម្ពុជាសូមចូលរួមគាំទ្របន្ថែមទៀតពិសេសពានរង្វាន់លីគកំពូលកម្ពុជា ពានរង្វាន់សម្ដេច និងគាំទ្រដល់បណ្ដាក្លឹបបាល់ទាត់ផ្សេងៗផងដែរ ព្រោះកាលណាមានការគាំទ្រដល់ក្លឹបទើបក្លឹបមានការអភិវឌ្ឍន៍ ទើបក្លឹបអាចបង្កើតធនធានល្អៗបន្ថែមដែលនាំឲ្យវិស័យបាល់ទាត់នៅកម្ពុជារីកចម្រើនបន្ថែមទៀត។
នាយិកាគ្រប់គ្រងក្លឹបទាត់វិសាខាថ្លែងអំណរគុណដល់ ព្រីនស៍ ដែលបានចូលរួមជួយឧបត្ថម្ភដល់ក្លឹបនាពេលកន្លងមកពិសេសក្នុងស្ថានភាពជំងឺកូវីដ ១៩ ក្ដីក៏នៅតែបន្តជួយជ្រោមជ្រែងផងដែរ។ កញ្ញាសង្ឃឹមថាការសហការជួយអភិវឌ្ឍន៍បាល់ទាត់មួយនេះនឹងបន្តដំណើរជាមួយគ្នាវែងឆ្ងាយទៅមុខទៀត។
បញ្ជាក់ដែរថា ពិធីអនុស្សារណៈយោគយល់គ្នា (MOU) របស់ក្លឹបបាល់ទាត់វិសាខាជាមួយធនគារព្រីនស៍ គឺក្រោមគណៈអធិបតី លោកជំទាវ កែ សួនសុភី ប្រធានក្លឹប។ ពិធីនេះធ្វើឡើងកាលពីព្រឹកថ្ងៃទី១១ ខែកញ្ញា ឆ្នាំ២០២៣ នៅក្លឹបបាល់ទាត់វិសាខា។ MOU នេះគឺមានរយៈ៣ឆ្នាំបន្តទៀត៕
